الشاعر هاني البريدي المسعودي

*****

من سهول سيناء، يطل شاعر الفصحى الشاعر  هاني البريدي 

المسعودي، بقصائد مشبعة بنكهة المكان، ورائحة الريحان والكادي.

ــــــــــــــــــــــــــــــــ

(شعر مدح مختار) مهداه للاخ هاني البريدي

اخـتــار سـمـحـات الـــدروب النّظـيـفـة ^ اللـي غسلهـا رايــح الـمـزن بـرشّـاش 

مشّونهـا قـوم النّفـوس الشّريـفـة   ^  اللي ضمايرهـم نقيّـة كمـا الشّـاش

 بيوتهـم مثـل الحصـون المنيـفـة   ^ ما هي لطير البوم غيران أعشـاش

 وحلالهـم للضيّـف دايـم مريـفـه   ^ لو رجلهم يسرح ويضوي على مـاش 

والرّجـل منهـم مـا يخلـي رديفـه   ^ إن ما ت مثله مات وإن عاش له عاش

 وإن مات منهم رجـل عقـب خليفـة  ^  يطعن نحور القـوم ويـرد الأدبـاش

 يعرف هدف روحه ويعـرف وليفـه  ^  ما يعرف الخونـة ولا هـو بغشـاش 

وليـّاً رزقـه الله بعـذراء عفيـفـة   ^ ايحطها مـا بيـن نونـه والارمـاش

ماهو على الخفـرات يستـل سيفـه   ^ وان طالعوا فيـه الرياجيـل ينحـاش 

حلـو النبـا سمـح المحيـّا لضيفـه  ^  ويصير له خـادم مسخّـر وفـراش

 وان مـد مـا مـدّت يمينـه قصيفـة   ^ مدّت يمينـه تبهـر الخبـل والـلاش 

والياً هـرج تلقـى علومـه طريفـة  ^  ما هـو لهفـوات المناعيـر منقـاش 

وإن شبّت النيـران مـا هـو بليفـة   ^ في ساعة الكربـة سـواي ورشّـاش 

سدّه بعيد ولا أحـد يعـرف غريفـه   ^ ولا هو لعرض المكرم العرض نهاش 

والشوك في جنبـه سـوات القطيفـة   ^ إن كان ما له بيت مأمـون وفـراش 

ما يرتكي فـوق الخبـول الضعيفـة   ^ اللـي ليـا حركتهـا قدرهـا طـاش

وإن جـا نهـار كـل قـرم يعيـفـه   ^ ما هو ليا ثارت على القـوم رمـاش 

الكذب يعرف بيـن الأجـواد زيفـه   ^ والصّدق مثل السّيف صاطي وحشّاش 

وصحيفته يـا طيبهـا مـن صحيفـة   ^ ولهـا مـن العقـال كاتـب ونقـاش

حـاز المراجـل والمراجـل كليفـة   ^ إلا على اللي كل مـا رامهـا هـاش 

وإن شاف له من جانب القـوم خيفـة  ^  تلقـاه للخيفـة مهـاجـم وبـطـاش 

الصّدق والمعـروف والطيـب كيفـه  ^  ويغبش لها مع طلعة الفجـرمغبـاش 

للحمل مـا تلقـى جنوبـه صخيفـة   ^ حوله بروق تعمـي العيـن وفـلاش

يصبر على جرحـه ويمسـح نزيفـه   ^ طبه بشبه خير مـن طـب الاحبـاش 

ولا هو كمـا سبـع سنونـه ضعيفـة  ^  دايـم يلحسهـا وللعظـم عــراش 

وان شاف له في غيبة النـاس شيفـة   ^ ما هو بخبل لاخضر العـود قـراش

 دنيـاه لـن صـارت ذلـول عسيفـة   ^ طوع عليها كـل عاصـي ونفـاش

وان كان قفـت مـا عليهـا حسيفـة   ^ ولا هو ورا هوج المعاصير قشـاش 

وإن جاع ما وقع كمـا طيـر جيفـة   ^ وإن عري ما يلبس سماليل وأخيـاش 

ـــــــــــــــــــــــــــــــــــــــــــــــــــــــــــــــــــــــــــــ